الحلقة الخامسة
بعد ما جميلة دخلت عشان تعمل الشاى سمعت صوت وراها بتلف عشان تشوف مين ؟؟ طلع يوسف
اتفاجأت جميلة لما لقت يوسف معاها فى نفس المكان وهما لوحدهم ( ليلى بره بتحضر القاعده )
يوسف : (ياخد من ايديها برطمان السكر وبمنتهى قلة الذوق ) : وسعى كده .(عاوز يردلها القلم )
جميلة : بنرفزه :ممكن تخرج من هنا دلوقتى .
يوسف : انتى عبيطة يا بنتى ولا ايه دة مطبخنا أحنا يعنى انتى هنا فى حتتى .
جميلة : اتعصبت اكتر : انا اللى هعمل الشاى ومش بحب حد يقف جنبى . لو سمحت امشى يالا
يوسف : وانا بقى مش عاوز اشرب حاجه من ايديك , اصلى بصراحه كده بقـــــــــــــــــرف (بتناكة ورخامه )
جميلة : ومين قالك اصلا ان انا كنت هعملك حاجه اصلا ؟؟؟؟؟؟؟ (بغيظ)
يوسف : والله !! اومال الكوباية التالتة دى لمين ؟؟
جميلة : انا بشرب كوبايتين عندك مانع ؟؟
كل واحد فيهم واقف يبص للتانى اكن بينهم طاااااااار , اول ما الماية غليت كل واحد كان عاوز هو اللى ياخد البراد زى العيال الصغيره بالظبط (مجانين)
جميلة: ااااااااااااه أيدى (اتلسعت ) .. انت اصلا حد غبى , وحطت على ايدها ماية
يوسف : (اتخض عليها) بجد انا اسف مش قصدى والله , وبسرعه يجيبلها مرهم للحريق ومن غير تفكير راح مسك ايديها عشان يشوفها ويحطلها المرهم
جميلة بتبص عليه ومستغربه أنه مخضوض عليها اوى كده , وهى بصاله رفع يوسف راسه عشان يبص عليها لقاها باصه عليه راح تنحلها كده وفضلوا مسبلين شوية (عارفين انتوا المسلسلات التركى لما البطل يفضل متنح للبطله ويسبلوا لبعض ؟ هو المفروض بعد كده بيعطفوا ويلطفوا بس دى النسخه التركى , النسخه المصرى بقى )
جميلة تشد ايدها من يوسف : وسع كده مش ليك دعوه بيا اصلا وراحت خارجه
ليلى : ايه يا بنتى فين الشاى ؟؟؟
جميلة : يوسف هيكملة عشان اتحرقت .
ليلى : لا بعد الشر عليكى . قلتلك اعمله انا مش رضيتى
وبعد ما الشاى اتعمل واتشرب سهروا التلاته سهره عائلية كلها ضحك وهزار بس الهزار بتاع جميلة ويوسف كان هزار بوابين يعنى رخااااامه وغتاته وتلقيح كلام وكده ... بعدين ليلى جالها تليفون تقوم ترد عليه وتسيب يوسف وجميله مع بعض لوحدهم
هما الاتنين ساكتين وكل اللى بيحصل شويه نظرات رخمه كده
جميلة : فى حاجه ؟؟
يوسف : هو انا كلمتك ؟
جميلة : اصلك عمال تبص اوى كده زى مايكون بتشبه مثلا (باسلوب رخم طبعا زى عادتها )
يوسف : هو انتى بتتلككى ولا ايه ؟؟ وبعدين مش عاوزه تشوفينى مش تبصى ناحيتى ماشى
كفايه شايفك من ساعه ما قعدتى عينك مانزلتش من عليا وانا ساكت .
جميلة : أناااااااااااا (باستغراب ) لا والله !! ومش بعاكسك كمان ؟؟ ما انت اصلك حلو اوى وانا معجبه بيك شكلى .
يوسف : بمنتهى الرخاااامه : لا ياماما انا لما افكر فى واحده مستحيل تبقى زيك فى اى حاجه . يعنى مش تعشمى نفسك عشان مش تتصدمى بعد كده . (هههههههههههههه رخم رخم يعنى )
جميلة : يابنى انت لو اخر واحد فى الدنيا انا عندى ابقى عانس ولا ارتبط بيك اصلا .
يوسف : باستهزاء : (ابقى عاانس ) هو انتى لسه هتبقى ؟مانتى عانس فعلا . ده انا شايف عندك شعر ابيض يابنتى
جميلة دمها اتحرق جدا ومش عارفه تسايره ويوسف عمال يديها على دماغها ومش عارفه ترد عليه
جميلة : ليلى انا ماشية وتخرج على شقتها وهى متغاظة .
يوسف طبعا عمال يضحك عليها ومبسوط انه استفزها وحرق دمها زى ماهى عملت معاه .
ليلى : ايه دة ؟؟ اومال جميلة راحت فين ؟؟
يوسف : روحت .
ليلى : أزاى تمشى من غير ماتعرفنى !! أوعى يا يوسف تكون قلتلها حاجه ضايقتها ولا تكون هزرت معاها هزارك الرخم ده ؟؟ جميلة بنت رقيقه جدا وممكن تكون اتضايقت من هزارك ..
يوسف : بيضحك جامد اوووووووى : رقيقه (بسخريه) ؟؟ يا بنتى ده انا بحس انى بكلم صاحبى
ده الواد يحيى فيه الانوثه عنها ( يحيى ده انتيم يوسف وهنعرفه فى الحلقات الجايه )
ليلى : يوسف ... عيب عليك مش تقول كده على صاحبتى . بجد جميلة دى اسم على مسمى جميلة ورقيقه جدا
يوسف وليلى فضولو يتكلموا ويرخمو على بعض واليوم خلص على كده.
وتانى يوم جميلة كان عندها مقابلة شغل , لبست الحته اللى على الحبل واتشيكت وخرجت وبره لقت يوسف بيدخل الاسانسير
جميلة : ثوانى لو سمحت .
يوسف : اركب لوحدى واسيبك زى ما نتى عملتى ؟؟؟
جميلة : ماتركب لوحدك انت هتخوفنى مثلا ؟؟؟ (مش هتتغير ابدا)
يوسف : انا هطلع احسن منك واخليكى تنولى شرف انك تركبى معايا . اتفضلى .
جميلة : بمنتهى التناكة تدخل الاسانسير , وكانت حاطه (بيرفيوم ) جميل جدا أول مايوسف شم ريحته العادى انه يعجبه طبعا ,بس بما اننا بنتعامل مع اتنين مجانين الوضع كان مختلف .
وطبعا يوسف مش هيسيب فرصه زى دى تعدى من غير مايستغلها .
يوسف : اااااااااااااففففففففففف ايه الريحه الوحشه اوووووووووى دى يعععععع (بيلقح عليها طبعا )
جميلة : (فهمت انه بيرخم عليها ) اه فعلا انا اول مادخلت شميت ريحه بشعه ابقى غير نوع البرفيوم بتاعتك الناس مالهاش ذنب تشم الريحه دى ( تيجى تصيده يصيدك ) .
يوسف مش عرف يرد طبعا بعد الكسفه الفظيعه دى وشاف ان السكوت أكرمله .
راحت جميلة مقابلة الشغل وزى العادة رجعت بخيبه الامل بس زعلها على الوظيفه اللى راحت مايجيش حاجه جنب الصدمه اللى كانت مستنياها .....
ياترا أيه المفاجأه اللى كانت فى أنتظار جميلة واللى كانت بالنسبه ليها صدمه جديدة فى مسلسل صدمات ياعالم هتخرج منه أمتى ؟؟؟
هنعرف الحلقة الجايه .
ومش تنسوا تقولوا رأيكوا فى الحلقة ...
(hgpgrm hgohlsm)d,ldhj"d,st&[ldgm"
0 التعليقات:
إرسال تعليق